Bitácora Na punta da lingua

Este curso 2022-23 o IES do Castro continuou co mantemento e ampliación da horta escolar e ademais, dende o proxecto A economía sostible: reciclaxe téxtil e horto urbano  realizouse a etiquetaxe das hortalizas sementadas en varias linguas: español, francés, galego, inglés e latín.  Deseguido recollemos algunhas imaxes para ilustrar a actividade. Imaxe 1 Imaxe 2

Este ano o EDLG participou coas compañeiras do Departamento de Matemáticas na conmemoración do Día internacional das Matemáticas. A actividade consistiu na lectura, en todas as clases do poema "O número Pi" da poeta polaca Wislawa Szymborska, traducido ao galego por Lucía Caeiro e publicado por Edicións Positivas. Ademais, por megafonía unha alumna de 2º de Bacharelato leu o poema de Szymborska 10 minutos antes do recreo do día 14 de marzo.

Este curso académico abrimos unha conta de Instagram do EDLG coa finalidade de darlle difusión a todas as actividades realizadas.  Se aínda non a coñecedes, estades convidados a seguirnos en edlgdoiesdocastro !

O mércores 14 de xuño o alumnado de 1º de Bacharelato Internacional fixo unha saída cultural e literaria á vila de Cangas do Morrazo. A viaxe comezou ás 9:45h da mañá no porto de Vigo, onde subimos ao barco que nos trasladou a Cangas. Á chegada estábanos esperando a nosa guía Aroa, unha alumna oriúnda da zona que foi quen nos fixo a visita guiada nun galego con trazos dialectais propios da península do Morrazo. A visita iniciouse cunha explicación sobre os patíns mariñeiros conservados na vila, a colexiata de Santiago de Cangas, o episodio histórico relacionado co saqueo de Cangas polas tropas turcas, que inspirou a creación da composición poética que comeza "Polo camiño...", a capela do hospital, nal cal puidemos ver unha exposición sobre naufraxios ao longo da historia e o interese da canguesa María Soliño, a quen dedicou un poema Celso Emilio Ferreiro titulado "Polos camiños de Cangas". Despois de xantarmos pola vila e repoñer forzas comendo un xeado, a tarde com...

Durante o 3º trimestre o alumnado de 1º de Bacharelato realizou unhas breves presentacións orais coa finalidade de poñer en práctica a expresión oral e tamén achegarse á cultura e ao patrimonio galego, dado que foron estes os temas propostos. Ofrecemos nesta entrada algunhas das presentación realizadas polo alumnado: a) Ana F. e Irene P. de 1º de Bacharelato D faláronnos das mellores praias galegas e acompañaron o seu discurso coa estupenda presentación que recollemos. b) Sabela C. e Aldara O., tamén de 1º de Bacharelato D, centraron a súa exposición no baile galego e elaboraron unhas fantásticas  diapositivas . c) Carmen B., Rosa B. e Nora B. de 1º de Bacharelato A centraron a súa exposición no Roteiro dos faros e elaboraron unhas fabulosas diapositivas.

O alumnado de 1º de Bacharelato A o día 7 xuño, xa coa avaliación rematada, tivo a oportunidade de achegarse á figura do autor homenaxeado o Día das Letras Galegas, Francisco Fernández del Riego, visitando a Biblioteca Penzol, da cal foi director e á cal dedicou moito do seu tempo. A saída estivo organizada polo EDLG e polo Departamento de Lingua galega e literatura e os rapaces e rapazas estiveron acompañadas polas profesoras Susana Paz e Raquel Rodríguez. A visita comezou ás 12:15h da man do seu director, Xosé Manuel Soutullo, un extraordinario guía, que nos recibiu no salón de actos da Casa Galega da Cultura e nos contou a historia da institución e tamén a vinculación cos galeguistas Fermín Penzol e Francisco Fernández del Riego. Unha edición facsimilar do Códice Rico das Cantigas de Santa María , coordinadas por Afonso X, e do Cancioneiro de Ajuda  abriron o percorrido pola institución.  Deseguido, a visita continuou polas bibliotecas Penzol e Fernández del Riego e polo ar...