Visita á Fundación Penzol e á antiga imprenta de Juan Compañel

De
O alumnado de 1º de Bacharelato A o día 7 xuño, xa coa avaliación rematada, tivo a oportunidade de achegarse á figura do autor homenaxeado o Día das Letras Galegas, Francisco Fernández del Riego, visitando a Biblioteca Penzol, da cal foi director e á cal dedicou moito do seu tempo. A saída estivo organizada polo EDLG e polo Departamento de Lingua galega e literatura e os rapaces e rapazas estiveron acompañadas polas profesoras Susana Paz e Raquel Rodríguez.

A visita comezou ás 12:15h da man do seu director, Xosé Manuel Soutullo, un extraordinario guía, que nos recibiu no salón de actos da Casa Galega da Cultura e nos contou a historia da institución e tamén a vinculación cos galeguistas Fermín Penzol e Francisco Fernández del Riego. Unha edición facsimilar do Códice Rico das Cantigas de Santa María, coordinadas por Afonso X, e do Cancioneiro de Ajuda abriron o percorrido pola institución. 

Deseguido, a visita continuou polas bibliotecas Penzol e Fernández del Riego e polo arquivo e alí puidemos coñecer o valor dos fondos que se custodian no edificio relacionados coa cultura e o patrimonio galego, pero tamén coa literatura universal. En concreto, chamounos a atención a primeira edición de dúas obras fundacionais para a Literatura galega como son Cantares gallegos (1863) de Rosalía de Castro e Aires da miña terra (1880) de Manuel Curros Enríquez. Ademais, coñecemos o pergameo máis antigo custodiado no centro, escrito en latín, un documento a prol do Estatuto de Autonomía da autoría de Luís Seoane, cartografía antiga e unha vistosa executoria de fidalguía.

Tamén visitamos a recreación da sala de Ramón Piñeiro e a exposición permanente do Museo Francisco Fernández del Riego, onde puidemos coñecer obras de Ovidio Murguía, Luís Seoane, Colmeiro, entre moitos outros e outras artistas. O mapa de Domingo Fontán, exposto nas escaleiras que levan ao primeiro andar, puxo o peche á nosa visita á Casa Galega da Cultura.

A nosa xornada rematou na rúa Real, lugar ao que acudimos para situar a antiga imprenta de Juan Compañel Rivas, exactamente no número 21 da dita rúa e non no número 12 como se pensou durante moito tempo e así nolo deu a coñecer o historiador vigués Xurxo Martínez González.

Velaquí algunhas imaxes e un vídeo que ilustran a nosa última saída deste curso escolar.


Imaxe 1


Imaxe 2



Imaxe 3


Imaxe 4

Imaxe 5: nº 12 da rúa Real de Vigo


Imaxe 6: nº 21 da rúa Real de Vigo


Vídeo da xornada

Publicacións populares deste blog

Recursos electrónicos en Lingua galega

De
Imaxe
Inauguramos a bitácora do Equipo de Dinamización da Lingua Galega (EDLG) do IES do Castro cunha entrada na que  compilamos unha listaxe de recursos electrónicos en lingua galega, todos gratuítos, coa finalidade de que poidan ser de utilidade para toda a comunidade educativa. Dicionarios electrónicos Dicionario da Real Academia Galega Dicionario Digalego Dicionario de sinónimos do galego Dicionario castelán-galego de Rinoceronte editora Diccionario CLUVI inglés-galego Dicionario francés-galego Dicionario de dicionarios   (conxunto de dicionarios antigos) Diccionario de pronuncia da lingua galega Correctores Galgo Ortogal da UVigo Tradutores automáticos Gaio Open trad Apertium Traducíndote   Vocabularios específicos dixitais BUSCatermos Administración e xustiza Gómez Guinovart, Xavier (2005): Vocabulario xurídico-administrativo galego -castelán . Vigo: Universidade de Vigo, Servizo de Publicacións. Artes Álvarez Alonso, Yolanda (s.d.): Léxic...
Read more »

Presentacións do alumnado relacionadas coa cultura e o patrimonio galego

De
Imaxe
Durante o 3º trimestre o alumnado de 1º de Bacharelato realizou unhas breves presentacións orais coa finalidade de poñer en práctica a expresión oral e tamén achegarse á cultura e ao patrimonio galego, dado que foron estes os temas propostos. Ofrecemos nesta entrada algunhas das presentación realizadas polo alumnado: a) Ana F. e Irene P. de 1º de Bacharelato D faláronnos das mellores praias galegas e acompañaron o seu discurso coa estupenda presentación que recollemos. b) Sabela C. e Aldara O., tamén de 1º de Bacharelato D, centraron a súa exposición no baile galego e elaboraron unhas fantásticas  diapositivas . c) Carmen B., Rosa B. e Nora B. de 1º de Bacharelato A centraron a súa exposición no Roteiro dos faros e elaboraron unhas fabulosas diapositivas.
Read more »