Excursión a Pontevedra: Camiñada Sarmiento e Museo de Pontevedra

De

O día 30 de abril o alumnado de 1º de Bacharelato realizou unha saída didáctica na cal participaron o EDLG, o Departamento de Xeografía e Historia e o Departamento de Lingua Galega.

O día comezou realizando a Camiñada Sarmiento, promovida polo Servizo de Normalización do Concello de Pontevedra, a través da cal puidemos coñecer os espazos polos que transitou o bieito ilustrado durante a súa infancia e primeira mocidade na casa familia situada na praza de Méndez Núñez. Durante a hora e media que durou a andaina visitamos a rúa Sarmiento, os Arcos de San Bartolomeu, a praza da Pedreira, a rúa do Arco, a praza de García de la Riega, a Enfesta de San Telmo, a praza de Alonso de Fonseca, a avenida de Santa María, a praza de España, a rúa da Alfóndega, a rúa Tetuán, a rúa Real, a praza da Ferraría, o paseo de Antonio Odriozola, a Pasantería e, finalmente, a praza da Leña con un excelente guía que soubo contarnos as historias sobre a cidade de Pontevedra e a figura de Sarmiento do xeito máis ameno e divertido posible.

Ao rematarmos o roteiro, despois dun merecido descanso, trasladámonos ao Museo de Pontevedra para coñecer a obra de mulleres galegas artistas, visita guiada baixo o título Invisibles: arte en feminino. Alí tivemos a oportunidade de achegarnos á obra pictórica e escultórica de artistas femininas dende as últimas décadas do século XIX ata o comezo do século XXI. Entre elas Carmen Babiano, Elvira Santiso, María Röesset, Julia Minguillón, Maruja Mallo, Mª Victoria de la Fuente, Mª Antonia Dans, Elena Comeiro, Almudena Fernández ou Sofía Morales. Foi unha visita moi interesante e puidemos aprender moito das nosas artistas.

A actividade serviu para que na materia de Lingua Galega e Literatura o alumnado puidese ampliar os seus coñecementos sobre o movemento ilustrado en Galicia e na disciplina de Xeografía e Historia coñecese de primeira man a obra de artistas galegas, que foron estudadas na aula.

Dende o EDLG do IES do Castro queremos agradecer ao Museo de Pontevedra e ao Departemento de Lingua do Concello de Pontevedra as súas iniciativas para promover o uso da lingua e realizar actividades orientadas ao alumnado dos centros educativos.

Velaquí algunhas imaxes que amosan o ben que o pasamos!

Imaxe 1


Imaxe 2


Imaxe 3

Imaxe 4

Imaxe 5


Cabeza de muller de Maruja Mallo, 1946

Nota: as imaxes do alumnado contan con autorización para a súa publicación.

Publicacións populares deste blog

Visita á Fundación Penzol e á antiga imprenta de Juan Compañel

De
Imaxe
O alumnado de 1º de Bacharelato A o día 7 xuño, xa coa avaliación rematada, tivo a oportunidade de achegarse á figura do autor homenaxeado o Día das Letras Galegas, Francisco Fernández del Riego, visitando a Biblioteca Penzol, da cal foi director e á cal dedicou moito do seu tempo. A saída estivo organizada polo EDLG e polo Departamento de Lingua galega e literatura e os rapaces e rapazas estiveron acompañadas polas profesoras Susana Paz e Raquel Rodríguez. A visita comezou ás 12:15h da man do seu director, Xosé Manuel Soutullo, un extraordinario guía, que nos recibiu no salón de actos da Casa Galega da Cultura e nos contou a historia da institución e tamén a vinculación cos galeguistas Fermín Penzol e Francisco Fernández del Riego. Unha edición facsimilar do Códice Rico das Cantigas de Santa María , coordinadas por Afonso X, e do Cancioneiro de Ajuda  abriron o percorrido pola institución.  Deseguido, a visita continuou polas bibliotecas Penzol e Fernández del Riego e polo arquivo e a
Read more »

Entrevistas que suman

De
Imaxe
Dende o EDLG intentamos fomentar as actividades de expresión oral e, entre elas, ofrecemos nesta entrada unha pequena mostra da tarefa titulada  Entrevistas que suman . Nela o alumnado de 1º de Bacharelato tivo que realizar unha entrevista a unha persoa próxima (familiar, amigo/a ou coñecido/a) sobre algunha afección, destreza deportiva, traballo etc.) e des pois exercer de xornalista e trasladala ao papel. Ofrecemos a seguir unha pequena mostra. a) Miguel V. Cruz entrevistou a Íñigo de la Quadra-Salcedo . b) Paula P. R. e Tristán C. M. entrevistan a Juan Carlos Castro Salgado, presidente da Asociación Cigarrón de Verín. c) Carla L. P. e Sara V. P. entrevistan a unha marabillosa cociñeira.
Read more »

Celebración do Día das Letras Galegas 2023: Francisco Fernández del Riego

De
Imaxe
Coa finalidade de conmemorar o Día das Letras Galegas deste ano 2023 e achegármonos á figura de Francisco Fernández del Riego, no IES do Castro desenvolvemos unha serie de actividades tanto nos niveis da ESO coma no 1º de Bacharelato. A entrada do instituto acolleu unha montaxe dedicada a Fernández del Riego que se artellou a partir dunha serie de obxectos relacionados coa traxectoria vital e coa obra do autor homenaxeado: unhas lentes, unha lupa, imaxes de lugares representativos na súa vida, fotografías familiares, unha camiseta do Celta, unha pandeireta etc. Estes obxectos foron etiquetados cun código QR coa finalidade de que o alumnado coñecese a vida e obra de Del Riego dun xeito lúdico e dinámico. A realización desta actividade correu a cargo das compañeiras da Biblioteca do centro e do Departemento de Lingua galega e literatura. En colaboración co Departamento de Matemáticas aproveitouse a semana das Letras Galegas para fomentar a lectura da poesía galega situando varios poemas
Read more »